Ang
pinamalaking pagtitipon ng mga dartero sa kasaysayan ng darts sa
Pilipinas ay ginanap noong Robsons Sportscraft P100,000 Free-Registration
Darterong Pinoy sa Sta Lucia East Grand Mall, Setyembre 19-21, 2008.
Sapat na sapat ang 44 dartboards na nilarga ng National Darts Federation
of the Philippines, ang nangasiwa ng Darterong Pinoy.
Ang unang event na Classified Draw Doubles noong Setyembre 19
ay umabot ng 398, Fixed Doubles ay 356, Four-Man team 316, Open
Singles 258, Mixed Doubles 70, at ang mga Singles event ng Youth
52, Seniors 45 at Ladies 38. Ang kabuuang registration sa lahat
ng events ay umabot ng 1,533. Ang mga lumahok ay nanggaling sa
ibat-ibang bahagi ng kapuluan mula Baguio hanggang Mindanao.
Si Camille Flaviano, isang labing dalawang (12) taong gulang
na manlalaro sa Ladies Singles, mula sa San Antonio, Zambales,
ang naging “darling of the crowd’ ng sunod-sunod niyang
talunin ang mga beteranang manlalaro at umabot sa laban ng pagkakampeonato
ng Ladies’ Singles. Sa masayang sigawan at palakpakan ng
mga nanood, kapansin-pansin na may nangyayaring hindi pangkaraniwan.
At sa pagkampeonato ng Ladies’ Singles, pambihirang dami
ng tao ang nanood.
Katunggali ni Camille sa kampeonato si Jan Jan Hinojales ng Davao
City, ang number one ranked player ng NDFP. Ang malaking karanasan
ni Jan Jan na maglaro sa intablado ng kampeonato ay nagsilbing
kalamangan niya sa kulang at unang Singles tournament ni Camille.
Nabigo man si Camille, marami siyang pinasaya.
Si Camille ay nasa Grade six ng San Antonio Elemntary School
– anim na buwan palang naglalaro at hiram lang ang ginamit
na dart sets noong araw na yon. Ang katangian ni Camille ay magaling
siyang magbawas at magkwenta ng kanyang score at mahinahon maglaro.
Tuwang tuwa si Butch Echeverri, ang pangulo ng Zambales darters
at namumuno ng tatlumpung manlalaro mula Zambales.
Kapanapanabik ang kampeonato ng Open Singles kung saan nagwagi
si Lourence Ilagan sa decision game 4-3 laban kay Orlan Bernardino
ng Taytay. Sa Youth Singles si Jaypee de Tablan ng United Darters
of Taytay ang nagkampeon sa kanyang huling laban bilang youth
player pagkatapos ng pagpupuwesto niya noong mga nakaraang Darterong
Pinoy. Si Abat Logatiman ang pumangalawa noong huling Darterong
Pinoy ay nagkampeon sa Seniors Singles ng talunin niya si Rizal
Malicsi ng Baguio City 4-3.
Sa Four-Man Team, ang Pier 1-Navotas ang kampeon na kinabibilangan
nila Boy Gionzon, Nayr Ocampo, Tolits Caluban at William Labjuan.
Ang mga ibang nagkampeon ay sina Arby Briones ng Baguio at Cris
Salinas ng Pasay City sa Classified Draw Doubles, Boie Parfan
at Orlan Bernardino ng Robson sa Fixed Doubles at Jan Jan Hinojales
at Boie Parfan ng Robson sa Mixed Doubles.
Samantala, ang Philippine Qualifier World Darts Championship
na gaganapin sa Sta Lucia East Grand Mall ay mag-uumpisa ng Open
Qualifying sa Setyembre 25, kung saan kukunin ang 16 players para
sa Round Robin Phase kasama ang top 16 NDFP ranked players at
ang 8 wild card regional qualifier. Ang mga side events ay ang
sumusunod: Setyembre 26 ay ang P21,000 Classified Draw Triples,
8:00PM; Setyembre 27 ay ang P17,000 Classified Draw Doubles 7:00PM
at sa Linggo Setyembre 28 ay ang P17,000 Open Draw Doubles, 1:30PM.
Ang Philippine Qualifier champion ay maging kinatawan ng Pilipinas
sa World Darts Championship, ang pinakamayamang dart tournament
sa buong daigdig kung saan ang katumbas na P60M ang papremyo.
Ito ay gaganapin sa London, Inglatera sa Disyembre 19 hanggang
ika-4 ng Enero, 2009.
