“Darterong Pinoy” – ano ba pinagmulan ng mga salitang
ito na paulit-ulit na binibigkas at naririnig sa kapaligiran ng
mga dartero.
Ang katawagan na Darterong Pinoy ay unang lumabas sa bukabularyo
ng mga dartero sa kauna-unahang dart tournament na inilunsad ng
NDFP na pinamagatang Darterong Pinoy 1998. Saklaw ng tournament
na ito ay ang mga makabagong sukatan alinsunod sa pandaigdigang
pangangailangan.
Sa dart tournament na Darterong Pinoy 1999 ay nagsimula ang kauna-unahang
P100,000 dart tournament sa bansa. At sa Darterong Pinoy 2003
ay sinimulaan ang hindi pa rin matumbasang P100,000 Free-Registration
tournament. Darterong Pinoy 2003 din ang kauna-unahang dart tournament
na isinahimpapawid sa isang oras na TV Special. Ang Darterong
Pinoy dart tournaments ay ang pinakamalaking dart tournaments
sa bilang ng kalahok.na ginaganap sa bansa.
Ang terminong Darterong Pinoy ay nagmula sa nilikhang pangalan
ng isang NDFP tournament. Isang tournament na mayaman sa tradisyon
ng makabagong pananaw at panibagong simulain. Dahil tinitingala
ang kasaysayan ng Darterong Pinoy dart tournaments, ginamit ang
Darterong Pinoy bilang larawan ng makabagong dartero na naghahangad
ng panibagong kapaligiran, kultura at aspirasyon.
Ngunit habang lumilipas ang panahon ang terminong Darterong Pinoy
ay pangkaraniwan nang ginagamit na ang tinutukoy ay ang kabuuang
Pilipinong Dartero. Kaya kung dati ang Darterong Pinoy ay binibigkas
lang sa circulo ng mga NDFP, ito ay naging karaniwang termino
na ng mga dartero. Ito ang ebulosyon ng terminong Darterong Pinoy
– kung saan nagmula, ang una at ang kasalukuyang kahulugan.
Sa ibang paksa naman, marami ang nagtatanong kung saan nanggaling
ang mga kasalukuyang dartero upang lalo pang mapalaganap ang darts.
Sa isang market research na kinomisyon ng NDFP siniyasat ang pinagmulan
ng mga dartero at ang lumabas ay ang tinatawag na “breeding
grounds” ng dartero.
Ang pinagmulan ng dartero ay barangays 46%, Offices kasama na
ang gobyerno at pribadong korporasyon 24%, dart clubs and dart
venues 19% at mga eskuwela 11%.
Hindi katakataka na ang barangays ay ang pinagmulan ng halos
kalahati ng dartero. Lumalaganap ang mga inter-barangay dart leagues,
mga dart tournaments kasama na ang free-registration tournaments
sa suporta at sponsorship ng mga Local Government Units (LGU).
Kasama ang darts sa mga inter-department at national sportfest
ng mga gobyerno at pribadong korporasyon at nakakapag-enganyo
ng mga bagong dartero. At ang pambansang mga lokal dart associations
ang nagsisiwalat ng darts sa publiko sa kani-kanilang dart venues.
At sa tanong na “kailan nagumpisang maglaro” - Ang
7-12 na gulang ay 7%, 13-19 ay 33%, 20-29 ay 33%, 30-39 ay 21%
at ang 40-49 na gulang ay 6%.
Ang paglalaro ng darts ay isa sa pinakamurang libangan at walang
pinipiling edad. Ang kagamitan sa larong darts ay abot-kaya ng
karaniwang manlalaro at walang renta sa mesa gaya ng bilyar at
laruan gaya ng badminton. Ang dartboards ay maisasalpak sa garahe,
kalye o sa opisina. Sa hirap ng panahon masayang libangan ang
darts.