Handa na ang Association of General Santos City Darters (Agendarts) at si Manny Pacquiao sa paglunsad ng pinakamalaking dart tournament ng 2008 – ang P300,000 Pacman Cup 2008 na gaganapin sa General Santos City sa Agosto 1-3, 2008. Bisitahin ang ndfpdarts.com sa kabuuang detalye.

Ang Pacman Cup ay isang National Darts Federation of the Philippines (NDFP) sanctioned ranking event. Ito ang huling tournament na makapagkakamit ng NDFP ranking points upang mapasali sa top 16 ranked players ng NDFP at maging seeded sa darating na Philippine Qualifier sa World Darts Championship sa Setyembre.

Masusukat ang galing ng Mindanao darters sa inaasahang paglahok ng mga pinakamagagaling na manlalaro sa ibat-ibang bahagi ng bansa. Natiempo pa ang Pacman Cup sa Promo Fares ng isang airline kaya marami ang maglalaro at naghahangad makalaro ang idolo ng bansa, si Manny Pacquiao.

Si Manny Pacquiao ay lubusang nag-eensayo hindi sa laban niya sa boxing ngunit sa laban niya sa darts. Si Manny ay lalaro sa Pacman Cup at makikita ang kanyang naiibang pukol ng darts. Parang boxing kaliwa at kanan kayang kaya niyang ibato ang darts.

Samantala noong nakaraang lingo matagumpay ang P100,000 T’nalak Open sa Koronadal City, South Cotabato, sa pangangasiwa ng South Cotabato Darters (Socodarts). Malaking kahalagahan ang pagtataguyod ni Jong Gonzales, ang pangulo ng Mindanao Archipelago Darts Federation (MADF), sa tagumpay ng T’nalk Open. Ang kabuuang manlalaro sa ibat-ibang events mula youth hanggang four-man teams ay umabot ng isang daan at apatnapung dartero (140).

Ang mga dartero ng Metro Davao Dart Association ang nagtunggali sa kampeonato ng Open Singles. Nagkampeon si Bebot Mangle ng talunin niya si King Gumanid sa iskor na 5-3.

Umabot sa decision game ang Ladies Singles, kung saan nagkampeon si Jan Jan Hinojales (Robson-Davao) at pumangalawa si Sheila Brana ng Socodarts, Koronadal.

Ang programa ng Dart Federation ng Kutawato (DFK), sa kabataan ay tuluyang nagbubunga. Kampeon si Tata Sarmiento at pangalawa si Daryl Bacera, parehong DFK players.

Ang nagkampeon sa Fixed Four-Man Team event ay ang Team Robson nila Ian Perez, Boie Parfan, Jojo Barellano at Bert Lozano. Ang pumangalawa ay ang dejadong team DFK nila Tinoy Guerra, Roland Ade, Popoy Langilao at King Gumanid.

Sa bagong event na Classified Fixed Three-Man Team, kung saan isang classified player lang ang maaring maglaro, ang Team Spectra ang nagkampeon na kinabibilangan nila Boie Parfan (Robson) , Ronnel Botor, (Abu Dhabi) at Juvic Lechonsito (Socodarts) at ang Team DFK ang pumangalawa nila JJ Sinsuat, Dennis Talagtag at King Gumanid.

Sina Ian Perez (Robson-Koronadal) at Boyet Go (Agendarts) ang nagkampeon sa Classified Draw Doubles at sina Pabling Cadungog (Directors) at Renato Teves (Socodarts) ang pumangalawa.

Hindi inaasahan ang magandang ipinakita ng mga DFK players. May bagong sigla ang Dart Federation ng Kutawato (DFK) sa bagong panguluhan ni Datu Duma ‘JJ” Sinsuat III, na siya ring Sports Coordinator ng Cotabato City. Ang mataas na pukol ng mga Metro Davao Darters ay nagmula sa lumalaganap na panglunsod na mga dart tournaments sa pamumuno ni Boy Gludo sa Davao City. Pumupuesto na ang manlalaro ng Socodarts at dahang-dahang sumasabay sa mga malalakas na dartero. Ang paglaki at pagsulong ng darts ay bumubulusok.