Sukdulan ng dami ang lumahok sa NDFP organized Chris Sports and
Robson Sportscraft P10,000 Free-Registration Tournament sa Tañong
Basketball Court, Marikina City, noong naka lipas na Sabado. Hindi
inaasahan ang dalawang-daan at walumput-dalawang (282) darterong
sumugod sa lakas ng ulan at hangin ng bagyong Cosme.
Malamang ito na ang pinaka-malaking P10,000 tournament kahit
sumabay pa ang isang P15,000 free-registration tournament na ginanap
din sa Marikina. Ngunit sa kasawiang palad, ang mas malaking P15,000
tournament ay hindi man lang nangalahati sa dami ng umagos na
dartero sa Tañong.
Sa dami ng manlalaro napilitang baguhin ang format ng laro. Sa
halip na 501 best of 3 sa winners bracket at 701 single game sa
losers bracket, ang naging pasya ng Tournament director ay gawing
single game 701 na lang sa winner’s at loser’s brackets.
Madaling araw man natapos ang tournament, kahit labing-walong
(18) dartboards na ang ginamit, ang mga dartero ay umuwing masasaya
sa dalawang –daang (200) flights and shafts at dalawang
dartboard na pina-raffle ng sponsors – Chris Sports at Robson
Sportscraft.
Higit pang pinasaya ang mga dartero, nang ipinahayag ng panauhing
pandangal, Vice-Mayor Marion Andres ng Marikina City, ang isa
pang P10,000 free-registration dart tournament na kanyang tatangkilikin
sa darating na buwan.
Buong pusong nagpapasalamat ang NDFP sa mga darterong pinahalagaan
at sinuportahan ang kauna-unahang organized dart tournament ng
NDFP sa NCR; lalo na ang mga manlalarong nagmula pa sa malayong
purok ng Cabiao, Nueva Ecija at Batangas City.
Samantalang hinihintay natin ang lugar at araw ng P10,000 Free-Registration
Vice Mayor Andres Cup, ang P10,000 Free-Registration Ariel Inton
Cup ay nakatakda sa ika-7 ng Hunyo sa Project 4, sa pangangasiwa
ng MP4 (Marilag Project 4 Dart Association) nila Edwin Angeles
at Errol Selga. Bisitahin ang ndfpdarts.com sa kabuuang detalye.
Kapuna-puna ang dami ng mga kabataang naglalaro, pumupuwesto
at nagwawagi sa mga dart tournaments. Gaya ni Jayson Bautista
ng Angalo Circuit Dart Club (ACDC) ng Tondo, isang labing apat
na taong gulang na nagkampeon sa Del De Guzman Cup. Ang mga manlalarong
Christopher Enriquez ng Pasig City, Julius Revillo at Martin Mateo
ng Santolan, Pasig ay ilan sa mga pumuestong kabataan.
Ang sigla ng kabataan ay hindi isang nagkataong pangyayari ngunit
isang commitment na ipinatutupad sa programa ng NDFP. Ang NDFP
lang ang naglulunsad ng Youth Singles. Ito ay makikita sa ilang
pambansang tournaments gaya ng Darterong Pinoy, Talakudong Open,
at ilang napipiling sanctioned tournaments ng NDFP. Ang lahat
ng Youth Singles ay libre at walang bayad.
Ang kahalagahan ng mga tournaments na ito ay may tutumbuking
laro na nakalaan lang sa kabataan. Si Ian Perez ng Koronadal ang
unang kampeon ng Darterong Pinoy (DP) Youth Singles noong 1999
at nag-kampeon na rin ng DP Open Singles 2005, at kasalukuyang
ranked number 2 ng NDFP. Nahasa si Ian mula pa noong kabataan.
Ang binhing itinanim sa kabataan ay sumisibol na. Ilang halimbawa
ay sa Cotabato City sa ilalim ng Dart Federation ng Kutawato (DFK)
at sa Upi, Shariff Kabunsuan kung saan kasama na ang dart programs
para sa kabataan. Tuloy-tuloy ang youth programs sa NCR ng ACDC
ng Tondo, United Darters of Taytay (UDT) at sa Escopa, Project
4.
Ang kinabukasan ng darts ay nasa kabataan.